Hebrews 13
Tᵾn Nga Wamp Ʉngᵾnᵾl Mbᵾ, Numan Minal Ngᵾmin
1Wote enim ndi, wamp mat numan nguk, Kraist nga wamp mbᵾ kundᵾk, angmᵾn mbᵾ nᵾi! 2Pilik kun etᵾk, wamp kuimp keta kᵾni nᵾkᵾni mat, enim nga mang kona ila ong ndam, enim ndi, rawe etᵾk tᵾi! Unt wamp mat ndi, i ku etᵾk, anggelo kuimp keta kᵾni nᵾkᵾni mat, rawe etᵾk tᵾk, en enim nga mang kona mbila mek purung ku. 3Wote wamp mat, kum nga manga ila petmin mbᵾ mel, nim i ku etkᵾn, kumnga manga ila pet ku nᵾkᵾn pili! Wote wamp mat, mindil tᵾk mormin ei mel, nim i ku etkᵾn, mindil tᵾp mor ku nᵾkᵾn pili!4Wu amp ti uⱡ na, amp wu ngui uⱡ na mbᵾ tᵾk ou ndᵾi. Wote, ei mel ku etᵾk, wu amp raⱡ nga rᵾk ting ila ik teng ndui uⱡ ei piyangga! Ei nga, Got ndi, wamp namin mat, uⱡ kit mat etᵾk, wapra rok eng mbᵾ, elim ndi, kᵾmp tᵾmba. 5Enim ndi, ku moni kandpa kum pindi uⱡ ei, pep rui nᵾrᵾi mon! Ei kᵾn, enim nga tek mormin mel mbᵾ, kapⱡa mint nᵾk pilᵾi! Wote Got ndi, nimba mel,
“Na ndi, enim wak rop pi napᵾr mon!” nᵾtᵾm.
6Uⱡ ei nga, tᵾn nga numan orunga, ronduⱡ mundpᵾn moⱡpᵾn, nimbun mel,
“Got ndi, na tᵾpa rapᵾndᵾmba ei nga, na mundmong iti nᵾtimp. Wote, wamp mbᵾ ndi, na kᵾn namba uⱡ ti iting?” nᵾtmin.
Tᵾn Jisas Pep Ruimin Ei Nga Pipil Kuⱡi Nᵾⱡmin
7Enim unt nga rᵾp etᵾng wamp mbᵾ ndi, Got nga ik, enim kundᵾk nᵾtᵾng ik mbᵾ, enim pilik kai itᵾi! Wamp mbᵾ nga nombuⱡa mam andᵾk, rᵾng nok, wote kolk etᵾng uⱡ mbᵾ, enim mondᵾk pilik molk, pep rᵾi! 8Jisas Kraist wu tenda ei, unt murum, akup morum, wote moⱡpa mint mba. 9Wote, ik mbo elpa elpa mat ndi, ruk omba, enim kundpa mepa pangga kᵾn, Got nga nombuⱡa mam kupa ei, wak rui nᵾrᵾi! Wote, Got nga wamp kont kaimp kul uⱡ ronduⱡ mbᵾ, enim nga numan orunga pem ndam, ei kapⱡa! Wote, enim nga kᵾng orunga, rᵾng normin uⱡ mbila, pep rui nᵾrᵾi mon! Wamp mat, unt rᵾng normin uⱡ mbila, pep rorung mbᵾ, rᵾng mbᵾ ndi, tᵾpa rᵾpndi nᵾpᵾndrᵾm mon! 10Wu pris kuimbal mat, Jura wamp mbᵾ nga muⱡ manga ila, kongun etmin wu mbᵾ ndi, tᵾn nga kaⱡᵾp tindiⱡim mondmᵾn mel mbᵾ, nuing mel, kapⱡa mon!11Jura wu pris kuimbal mbᵾ ndi, kng mema mbᵾ, kulk mek puk, Manga Kukaⱡ Wingti Kupa ila, mukᵾr puk, wamp nga uⱡ kit etᵾng mbᵾ, wak rundangga nᵾk, kalk tindiⱡim mundrᵾng. Wote, kng on ei mek pena ok, ekit orunga ndip karᵾng. 12Wote, uⱡ puⱡ ila, Jisas i ku etpa, kona peng ou ei nga paⱡa ekit orunga kurum. Uⱡ ei ndi, elim wamp mbᵾ nga uⱡ kit mbᵾ, elim nga mema ei ndi, ⱡumᵾi rundrᵾm. 13Ei nga, tᵾn akup, Jisas kᵾn paⱡa ekit orunga mbun kona ila, elim pipil kurum uⱡ ei mel, tᵾn kunda pipil kuⱡamin. 14Ei nga, tᵾn pᵾnmᵾn ei, ya mᵾi kona peng ronduⱡ ila, tᵾn moⱡᵾp mint pi nᵾpᵾmin mon. Tᵾn kona peng ti, wote omba ei nga kurᵾp mormin. 15Ei nga, tᵾn rᵾk rᵾk, Got nga mbi paka rondpᵾn, kaⱡᵾp tindiⱡim mundpᵾn, Jisas ei kᵾn, angge nimbun, elim nga mbi ei, tᵾn nga keta ei ndi, paka rundamᵾn. 16Wote enim ndi, wamp mat uⱡ kai etᵾk, tᵾk rapᵾndᵾk iting ei nga, tᵾk apra ndui nᵾndᵾi mon! Ei nga, uⱡ kun kai mat kalk tindiⱡim mondᵾrmin mbᵾ ndi, Got nga numan orunga etᵾk wang ndurmin.
17Enim wamp mbᵾ ndi, Got nga rᵾp wamp mbᵾ nga ik kum tek, ik nᵾng ei mel pep rᵾi! Wamp mbᵾ ndi, muⱡ ti natᵾk, enim nga numan orunga kandᵾk mormin ei nga, en enim Got nga kongun rᵾp endᵾtmᵾn wamp mbᵾ, ronduⱡ mundᵾk muⱡᵾi! Enim ik mbᵾ kum teng ndam, wamp mbᵾ, rᵾp etmin kongun ei, numan nguk iting. Wote, wamp numan kit pilik kongun eng ndam, uⱡ i eng ei ndi, en enim tᵾpa rᵾpᵾndi napᵾndᵾmba.
18Enim ndi, Got kᵾn atinga rok itangina, Got ndi, tᵾn kongun wamp mbᵾ, tᵾpa rᵾpᵾndangga! Tᵾn nga numan orunga, kai etpa piyangga! Nambuⱡ emel, Got nga kuimp keta ila, uⱡ kun kai mbᵾ mint itmin. 19Wote na ndi, enim kᵾn ronduⱡ mundᵾp waldᵾnt ei, enim ndi, Got kᵾn, na nga atinga rundangina kᵾn, Got ndi, na tᵾpa rᵾpᵾndangga, enim kᵾn nondpa yant uimp.
20Got ei, wamp kont pi uⱡ ei nga Puⱡ Wu ei ndi, tᵾn nga Nuim Jisas ropa rᵾt ndurum ei nga, Kng Sipsip Rᵾp Wu Kuimbal ei, ropa rut ndupa titim. Uⱡ i itim ei ndi, rᵾk rᵾk kont mba mul uⱡ ei, nimba mᵾi rurum. 21Wote, Got nga numan wang ndui uⱡ ei ndi, uⱡ kai mat enim ngum ndam, Got elim nga numan pᵾtᵾm uⱡ mbᵾ mel, enim pep reing nimba etᵾm. Jisas Kraist ndi, uⱡ kai mat, tᵾn kᵾn etpa, elim mbi ou tᵾpa, uⱡ nga kᵾnt nga moⱡpa mint mba. Ei kupa!
Ik Koⱡmung Kat
22Wamp angmᵾn, na ndi, ik ti ronduⱡ mundᵾp, enim waldᵾnt ei, na nga ik ronduⱡ mundᵾp nᵾnt ei ndi, enim nga numan orunga, etpa ronduⱡ mundangga, raka nᵾk, kum tek pilᵾi! Na nga mon rop enim ngunt ei, ruⱡ kat mon! 23Enim ndi pilᵾi! Tᵾn nga ᵾngᵾn Timoti ni, kan manga ila ekit ndung ndam, Timoti tᵾkrᵾpa omba, na kandpa tangga, wote tᵾl enim kᵾn uimbil.24Tᵾn nga rawe iti uⱡ ei, mek puk, enim nga rᵾp wu mbᵾ kᵾn, Got nga wamp mbᵾ kᵾn ngᵾi! Wote, Itali kona ila mondpa pili wamp mbᵾ ndi, enim rawe enmin ku.
25Got nga wamp pol ti uⱡ ei, enim kᵾn pora, kan piyangga!
Copyright information for
MED